អ្នកណាៗក៏អាចមានអារម្មណ៍តានតឹង (ស្ត្រេស) បានដែរ ដូចជាអារម្មណ៍ស្ត្រេសពីការងារ ការសិក្សា និងបញ្ហាក្នុងទំនាក់ទំនងជាដើម។ ប្រសិនបើគ្រាន់តែស្ត្រេសតិចៗនោះ វាមិនមែណជាបញ្ហាអ្វីឡើយ ព្រោះវាអាចជាកត្តាជំរុញថាមពលអ្នក ឱ្យសម្រេចការងារឬការសិក្សាបានល្អ។ ចុះបើទៅជាតានតឹងឬស្ត្រេសខ្លាំង រហូតធ្វើឱ្យប៉ះពាល់ដល់អារម្មណ៍ ផ្លូវចិត្តនិងសុខភាពរបស់អ្នក តើគួរធ្វើបែបណា?
នេះជាវិធីសាស្ត្រមួយចំនួនក្នុងការគ្រប់គ្រងអារម្មណ៍តានតឹងឬស្ត្រេសរបស់អ្នក៖
១- ការគ្រប់គ្រងដង្ហើម (Breath) ៖ ដកដង្ហើមវែងៗ យឺតៗ គ្រប់ពេលដែលអ្នកចាប់ផ្តើមមានអារម្មណ៍តានតឹង។ ធ្វើវាឱ្យក្លាយជាទម្លាប់ ហើយអ្នកនឹងអាចបញ្ឈប់អារម្មណ៍តានតឹងតិចៗ មុនពេលវាក្លាយជាធំបាន។
ការធ្វើសមាធិគឺជាវិធីសាស្រ្តមួយក្នុងការគ្រប់គ្រងដង្ហើម (ប្រភព៖ Overstock)
២- រៀបចំរបៀបរៀបរយ (Get Organized) ៖ ធ្វើបញ្ជីការងារមួយ (to do list) ដែលរៀបរាប់ពីអ្វីដែលអ្នកចាំបាច់ត្រូវធ្វើភ្លាម និងអ្វីដែលត្រូវធ្វើបន្ទាប់។ បន្ទាប់មកសម្អាតកន្លែងរៀន ឬកន្លែងធ្វើការរបស់អ្នក ក៏ដូចជារៀបចំឯកសារក្នុងកុំព្យូទ័រឱ្យមានសណ្តាប់ធ្នាប់និងមានងាយស្រួលរក។
៣- ធ្វើចលនា (Move!) ៖ អ្នកអាចទៅហែលទឹក រត់ ជិះកង់ លេងកីឡា ឡើងភ្នំ ឬធ្វើអ្វីក៏បានដែរ ឱ្យតែអ្នកសប្បាយចិត្តនឹងធ្វើសកម្មភាពទាំងនោះ។
ការធ្វើចលនាហាត់ប្រាណ (ប្រភព៖ Key of Influence Person)
៤- ប្រាប់ពីអារម្មណ៍ទៅអ្នកដទៃ (Communicate) ៖ នៅពេលមានបញ្ហា កុំលាក់ទុកម្នាក់ឯង។ និយាយវាចេញមក ប្រាប់មិត្តភក្តិ សមាជិកគ្រួសារ ឬសត្វចិញ្ចឹមក៏បាន។ ហើយប្រសិនបើអ្នកមិនចង់និយាយ អ៊ីចឹងសរសេរវាចេញមក ដាក់ក្នុងសៀវភៅកំណត់ហេតុរបស់អ្នកទៅ។
៥. សើច (Laugh) ៖ មើលរឿងកំប្លែង រឿងសប្បាយៗ និយាយរឿងកំប្លែង មើលវីដេអូសំណើចលើទូរសព្ទឬកុំព្យូទ័រ។ ចូរចាំថាសំណើចរីករាយរបស់អ្នកឬអ្នកផ្សេង វាគឺជាឱសថល្អបំផុតក្នុងការកម្ចាត់ស្ត្រេស។
៦. មិនធ្វើអ្វីទាំងអស់ (Do nothing) ៖ បិទទ្វារបន្ទប់ គ្មានទូរទស្សន៍ គ្មានទូរសព្ទ គ្មានកុំព្យូទ័រ។ អង្គុយចុះ សម្រាកពីបញ្ហាជីវិត បិទភ្នែក និងមានអារម្មណ៍ថាភាពតានតឹងរលាយបាត់បន្តិចម្តងៗ។
រៀបរៀងដោយ៖ គង់ លក្ខណា
ពិនិត្យនិងចុះផ្សាយដោយ៖ ស៊ូ សុភក្ត្រា
សៀវភៅ សាកថ្មជីវិត
