១៥០០សំណួរចម្លើយអំពីពិភពលោក ភាគ១

ប្រែសម្រួល/រៀបរៀងដោយ បុល ប្រុសណយ
ISBN 978-9924-539-24-7
បោះពុម្ភៈ និង​ ចែកចាយ ហាតប៊ុក
ថ្ងៃខែឆ្នាំបោះពុម្ភ June 10, 2020
បោះពុម្ពលើកទី 1
ទំព័រ 315
តម្លៃ 23,000 ៛
លេខកូដសៀវភៅ HBC-039
“១៥០០សំណួរ-ចម្លើយអំពីពិភពលោក ភាគ១”​ ជា​សៀវភៅ​ ​កម្រង​សំណួរ​ចម្លើយរហូតដល់១៥០០ (ភាគ១នេះ មានចំនួន​៧៥០​សំណួរ​​​ចម្លើយ) ជុំវិញចំណេះដឹង​នានា​​​ពាក់​ព័ន្ធ​​នឹងជីវិត​រស់នៅ​ប្រចាំ​​ថ្ងៃ​របស់​​​មនុស្សយើង និងជុំវិញរឿងរ៉ាវនានាដែលកើត​មាន​នៅក្នុង​ពិភពលោក​ ​​​​ដែលយើងកំពុងរស់នៅនេះ។

សៀវភៅនេះ ហាក់មានភាពប្លែកបន្តិច ដ្បិតចំណេះដឹងត្រូវបាន​រៀបចំជាលក្ខណៈបណ្តុំសំណួរមួយចំនួនសិន រួចក៏បង្ហាញចម្លើយនៅ​ទំព័រ​​​​​​បន្ត​បន្ទាប់។​ ដើម្បីកាន់តែជក់ចិត្តនិងជាការសាកល្បងចំណេះដឹង​ខ្លួន​ឯងផង​ បងប្អូនអាចសាកល្បងឆ្លើយសំណួរ​សិន (ជាទូទៅមានពី១៥ទៅ​២០​សំណួរម្តង) មុនពេលចូលទៅកាន់ចម្លើយ។ ចំណុចដែល​គួរ​ឱ្យចាប់​អារម្មណ៍មួយទៀត គឺសៀវភៅនេះត្រូវបានរៀបរៀង​ជាពីរ ភាសាគឺខ្មែរ​និង​អង់គ្លេស ដែលអាចធ្វើឱ្យបងប្អូនបង្កើនចំណេះដឹង​ភាសា​អង់គ្លេស​ផង និងមានឱកាសស្វែងយល់កាន់តែស៊ីជម្រៅបន្ថែមទៅ​តាម​ចំណុច​នីមួយៗ ដែលពេលខ្លះត្រូវការពាក្យជាប្រភពដើម។

១៥០០ចំណេះដឹង ត្រូវបានរៀបចំតាមផ្នែករហូតដល់៩ផ្សេងគ្នា ដើម្បីងាយស្រួលផ្តោតអារម្មណ៍និងស្វែងយល់។ ផ្នែកនីមួយៗ ដូចមាន​បង្ហាញនៅទំព័រមាតិកាមុននេះបន្តិច ពិតជាបានគ្របដណ្តប់ជាច្រើនផ្នែក​នៃ​ចំណេះ​ដឹងជុំវិញពិភពលោក។ ទោះបីយ៉ាងណាក៏ដោយ ពិភពលោក​ដ៏​ធំ​មហិមា​ ប្រាកដជាមិនមានត្រឹមតែចំណេះដឹង១៥០០ចំណុចនោះទេ ពោល​គឺ​មាន​​ច្រើន​រហូត​ដល់រាប់មិនអស់។ ទោះបីយ៉ាងនេះក្តី​ បើសិនជា​យើង​មិ​ន​ចាប់​​ផ្តើម​​​ស្វែង​យល់​ម្តងមួយចំណុចៗទេ នោះយើងក៏នឹងគ្មាន​ថ្ងៃ​ស្គាល់​​ពី​ពិភព​លោក​ដែលយើង​កំពុងជាន់ជើងនេះដែរ ហើយពិសេស​ចំណុច​​ខ្លះ​ទៀត ​គឺនៅក្បែរក្លៀករបស់យើងថែមទៀតផង។

យើងខ្ញុំសូមអរគុណបងប្អូនដែលបានអានសៀវភៅនេះ។ ទោះបី​សៀវភៅមួយក្បាលនេះបានផ្តល់នូវចំណេះដឹងជាច្រើនក្តី ប៉ុន្តែវាពិត​ជា​នៅ​មាន​​ចំណុចខ្វះខាតនិងចំណុចខុសឆ្គងមួយចំនួន។ ម្យ៉ាង​វិញ​ទៀត យើង​ខ្ញុំក៏សូមជម្រាបជូនថា ​ចំណុចខ្លះអាចនឹងមាន​ការ​ដេញ​​ដោល​គ្នា ពាក់​ព័ន្ធនឹងព័ត៌មានមួយចំនួន​ដែលអាច​ខុសគ្នា ដោយ​សារ​ទិន្នន័យ​ខ្លះ​អាចមិនត្រូវតាមបច្ចុប្បន្នភាព ហើយម្យ៉ាងទៀតវាអាច​យោង​តាម​ប្រភព​​ផ្សេងគ្នាជាដើម។ ដូចនេះ យើងខ្ញុំសូម​​​អភ័យទោស​ទុក​ជា​មុន និង​រងចាំ​ទទួល​ការរិះគន់ដើម្បីកែលំអ​ឱ្យ​កាន់​តែ​​ប្រសើរ​ថែម​ទៀត​ នៅ​​​កា​របោះ​ពុម្ព​លើក​ក្រោយៗ។

សូមបងប្អូន កុំភ្លេចចែករំលែកអ្វីដែលបានចេះដឹងពីសៀវភៅនេះ ទៅ​កាន់​​មនុស្សជុំវិញខ្លួន តាមមធ្យោបាយដ៏សម្បូរបែបរបស់បងប្អូន​។ សង្គម​ជាតិរបស់យើងអាច​​រឹងមាំ​បាន​ដោយ​សារភាពរឹងមាំរបស់​យើង​ទាំង​អស់គ្នា។ ទាំងអស់គ្នា​រឹង​មាំ គឺដោយ​សារ​ការ​ចូលរួមនិងចែក​រំលែក​​​​គ្នា​ទៅ​វិញ​ទៅមកនេះឯង។

ដោយក្តីគោរព ស្រឡាញ់ និងរាប់អាន!

ភ្នំពេញ ថ្ងៃទី១ ខែមិថុនា ឆ្នាំ២០២០

​ក្រុមអ្នករៀបរៀង